За училиштето

Ц.О.У „Гоце Делчев“ се наоѓа на територијата на Општина Брвеница (оддалечено 18 км од Тетово), а во негов состав работат и подрачните училишта во с.Теново, с.Радиовце, с.Волковија и с.Гургурница. 

Првото училиште во селото почнало да работи како четиригодишно. Од 1951 година прераснува во осумгодишно основно училиште, а од 1962 година е номинирано како централно во кое учат и ученици од околните села. Директор на училиштето е Африм Емурлаи.

Целта на училиштето е да им овозможи на учениците индивидуален развој согласно нивните предиспозиции и кај нив да се развиваат чувства на одговорност, културни традиции и свест за припадноста на Р.Македонија како мултиетничка земја и во таа насока да ги почитуваат и исполнуваат граѓанските права и обврски. Училиштето води грижа да ги оспособи учениците да ги применуваат стекнатите излезни ефекти од образованието во разни области од живеењето. Сето тоа се планира да се реализира преку:

• Поставување на воспитно-образовниот процес врз принципите на современата образовна технологија
• Зголемување на образовната и воспитна компонента во училиштето
• Учениците да усвојуваат знаења, да ги развиваат своите способности и вештини потребни за продолжување на образованието и понатаму
• Подигнување на мотивацијата на учениците и наставниците
• Зголемување на соработката и поддршката со локалната средина
• Градење на соодветен систем на оценување согласно стандардите за оценување
• Воспитување на учениците за почитување на основните слободи и права на човекот за живеење во демократска и мултикултурна заедница
• Учениците да се поттикнуваат за правилен физички развој и одговорност за сопственото здравје, здравјето на другите како и заштита на околината.

МИСИЈА НА УЧИЛИШТЕТО

Нашето училиште се стреми да ги следи и применува новите наставни методи и современата технологија која овозможува оспособување на младите за работа и подобар живот и развивање на чувство за еднаквост и почитување на разликите како и оспособување за интеграција во мултикултурно општество.

ВИЗИЈА

Училиштето во иднина го гледаме како модерно, отворено училиште кое на учениците ќе им обезбеди адекватни услови за образование и воспитание и место во кое рамноправно ќе учествуваат во меѓуетничка интеграција.

МОТО

Квалитетно образование бара заеднички заложби.

СЛОГАНИ

Колку повеќе читаш, толку повеќе знаеш.

Повторувањето е мајка на знаењето.